2024/01/23 / Last updated : 2024/01/23 東京支店 News（Tagalog）

BAGONG SUSPEK SA MURDER CASE SA ADACHI KU, PINANGALANAN NA

Ang mga bangkay ng mag-asawang nasa edad 50 ay natuklasan sa ilalim ng sahig ng isang tirahan sa Adachi Ward, Tokyo. Una nang inaresto ang babaeng suspek na si Morales, Hazel Ann Bagisha, 30, dahil sa pag-abandona sa mga bangkay. Nahuli na ngayon ng Metropolitan Police Department ang isang bagong suspek na si Dela Cruz, Brian Jefferson Risin (34), isang Filipino na naninirahan sa Tsuchiura City, Ibaraki Prefecture.

Mula sa ulat ng NHK News, noong Enero 18, ang walang buhay na mga katawan ni Norihiro Takahashi (55), isang self-employed na residente ng bahay at ang kanyang asawang si Kimie Takahashi (52) ay natagpuan sa ilalim ng mga floorboard. Si Hazel Ann Bagisha Morales ay inaresto dahil sa hinalang pag-abandona sa mga bangkay. Ang mga security camera sa paligid ay nakunan ng footage ang isa pang kahina-hinalang tao na kasama ni Morales na pinaniniwalaan ng mga imbestigador na maaaring mayroon din impormasyon tungkol sa insidente.

Ang bagong nakilalang suspek na si Dela Cruz ay kakilala ni Morales at idinawit sa pag-abandona. Siya ay dinakip noong gabi ng ika-22 at umamin sa kaso na kinakasangkutan.

Parehong namatay sina Mr. at Mrs. Takahashi sa mga saksak sa dibdib. Ang Metropolitan Police Department ay aktibong sinisiyasat ang mga pangyayari na nakapaligid sa kanilang pagkamatay.