2023/09/08 / Last updated : 2023/09/08 東京支店 News（Tagalog）

SUSPENSYON SA OPERASYON NG MGA TREN DAHIL SA BAGYO, INANUNSYO

Inanunsyo ng JR East na magsususpinde ito ng mga serbisyo ng tren ngayong araw, Setyembre 8, dahil sa inaasahang malakas na pag-ulan dulot ng paparating na Typhoon No. 13.

Sa ulat ng Asahi Shimbun, sinabi ng kumpanya na ihihinto ang mga operasyon ng Tokaido Line sa pagitan ng Odawara at Atami stations mula unang biyahe ng mga tren hanggang tanghali pati na rin ang mga biyahe ng Ito at Kururi lines.

Masususpinde rin ang serbisyo sa pagitan ng Ome at Okutama stations sa Ome Line, pati na rin sa pagitan ng Komagawa at Yorii stations sa Hachiko Line, mula unang biyahe hanggang mga alas-kwatro ng hapon.

Nag-anunsyo rin ang JR Tokai ng posibleng pagkaantala at suspensyon ng kanilang mga operasyon sa lahat ng kanilang linya na bumibyahe sa pagitan ng Tokyo at Shin-Osaka stations.