2023/07/26 / Last updated : 2023/07/26 東京支店 News（Tagalog）

MGA SHOPS NA PINAGHIHINALAANG NAGBEBENTA NG CANNABIS LIQUIDS, SINALAKAY NG JAPANESE NARCOTICS AGENTS

Sinalakay ng mga Japanese narcotics control agents ang ilang tindahan sa buong Japan na pinaghihinalaang ilegal na nagbebenta ng mga likido na naglalaman ng cannabis para sa mga electronic cigarettes.

Ayon sa ulat ng NHK World-Japan, hinanap ng narcotics control department ng health ministry ang 28 na tindahan na nag-o-operate sa ilalim ng pangalang Goodchill sa 15 prepektura kabilang ang Kanagawa, Tokyo at Osaka. Pinapatakbo ang mga nasabing shops ng isang grupo na nagbebenta ng e-cigarettes.

Dagdag pa sa report, ang mga tindahan umano’y nagbenta ng mga likidong naglalaman ng cannabis na ginagamit sa e-cigarettes sa halagang humigit-kumulang sa 16,000 yen.

Nabatid ng mga ahente na mahigit sa 140 na portions ng likido ang nasamsam mula sa 20 na tindahan at na-detect ang cannabis sa ilan sa mga ito.

Inaalam pa ng mga otoridad kung saan binebenta ang mga ito.