2023/03/08 / Last updated : 2023/03/08 東京支店 News（Tagalog）

IBA’T IBANG JAPANESE AIRLINES, NAG-AALOK NG SEAT SALE NGAYONG SPRING

Makakabili ng murang airline ticket papunta sa iba’t ibang domestic destinations sa Japan ang mga biyahero ngayong spring dahil sa seat sale promos ng mga airline companies.

Nagsasagawa ang Hokkaido-based carrier na Airdo Co. ng spring sale mula 6,500 yen para sa one-way fare sa mga domestic routes nito kabilang ang Tokyo, Sapporo at Fukuoka para sa biyahe mula Abril 1 hanggang 27.

Balak naman ng Japan Airlines (JAL) na mag-alok ng one-way seats sa halagang 6,600 yen mula Marso 9 hanggang 14 para sa lahat ng domestic routes nito para sa flights na aalis mula Abril 14 hanggang Hunyo 30.

Sa ulat ng The Mainichi Shimbun, tila tumitindi umano ang kompetisyon sa airline industry habang papalapit ang Mayo 8 kung saan nakatakdang ibaba ng gobyerno sa class 5 ang COVID-19 tulad ng sa seasonal influenza sa ilalim ng infectious disease control law ng bansa.